iMAGINE

إحساس غريب لما تسمع أحد يتكلم كأنه يقول اللي بقلبك ولسانك ما نطق بكلمة، شخص غريب أو قريب وكأن مشاعرنا وظروفنا صارت تتشابه لكن تختلف بأحداثها.
كنت مع عميلتي الجميلة وقالت جملة أثرت فيني حيل، قـالت: “مصدومة من نفسي يا أم شاهين وين كنت قبل أشتغل وايد وطاقة ونشاط الحين مالي خلق” قالتها ومشروعها شغال ماشاءالله ولكن قل الحماس للتنفيذ والإنجاز، وأنا عرفت السبب لأني مثلها ويمكن مثلك.
في زحمة روتيني وأيامي وحياتي اللي تعودت عليها اكتشفت وبالصدفة إني حزينة، اكتشاف سببه إني خرجت عن المسار اللي حددته للوصول لاهدافي وخضت تجارب ومجالات تشتت بسببها تركيزي، كان الهدف إني أطور من مهاراتي أو أخوض المجال وأكبر، بالإضافة إلى ظروف شخصية وتقلبات الحياة الطبيعية الله يعين الجميع، واكتشفت في عز هذا التشتت إني فقدت الاستمتاع والحب وقت العمل رغم التعب، كمصورة وصانعة محتوى الوضع مرعب بالنسبة لي وصرت أحس بالتعب بسرعة على أي مجهود أسويه لدرجة صرت أشك بصحتي وأنا سليمة بس مالي خلق

الحياة صارت تفرض علينا التزامات وأمور علشان نقول لها لأ تضايقنا حييل مو شوي، وأحنا نكبر ما نصغر، تعرضت لضغط نفسي كبير للأمانة ومنها تأكدت إني فقدت شغفي اللي كان معطيني الحماس اني أسهر الليل وأصبح الصبح وأسعى وأتعلم، لذلك قررت أوقف وأعيد النظر، كان القرار مفاجيء لأني محتاجة لعُزلة وجاهدت إني ما أحسس الكل واشتغل على نفسي واكلم المقربين حيل عن اللي أحس فيه، فقط المقربين ❤️ وأشكر وجودهم بحياتي،
كل هذا وشغلي مستمر لكن بدون شغف. والحمدلله عدت النظر، لخصت الدروس والعبر من المواقف اللي مرت علي وجددت تقييم كل شي في سبيل إني أعيد جزء من هذا الشغف اللي بدونه مستحيل أستمر، السبب بكل بساطة ان طموحي ما كان تحويل هوايتي وحبي للمجال إلى وظيفة مستمرة ودخل مادي فقط، وإنما هو مساحة لخيالي اللي من خلاله أشارككم مشاريعكم ومشاعركم وبنفس الوقت نفيد بعض ونستفيد ونشارك أهدافنا، وحييييل حابه أترك أثر من خلال مجالي وشغلي اللي كل يوم أسعى إني أطوره، هذه مو أول مره أفقد فيها شغفي لكن هالمرة حبيت أشارككم لأن كثير عندهم نفس الاحساس، والحمدلله قدرت أرجع الحماس والحب في شغلي مع إني ما وقفت ولكن اتبعت خطوات والتزمت بقوانين رسمتها لنفسي علشان أرجع استمتع بوقتي واحس بانجازاتي اللي انتجها.
الكثير قالوا نفس جملة عميلتي وأنا منهم، سواء أصحاب مشاريع أو موظفين
عدم القدرة على التركيز بسبب سرعة الحياة حوالينا تخلينا نفقد روحنا واحساسنا بإنجازنا ونطيح في دوامه الروتين ونفقد الشغف،

لا تسمح لسرعة الحياة والظروف تنسيك اللي بخاطرك توصل له، والربح المادي أساسه إنجازاتك

👏 موفقين جميعاً

بشارككم الخطوات اللي ساعدتني أرجع حماسي قريباً 💘